ماڵپه‌ڕی " هه‌ڵوێستی ئێمه‌ "

رۆژی‌ دووشه‌ممه‌ 24ی‌ بانه‌مه‌ڕ له‌لایه‌ن ناوه‌ندی‌ شێعر‌و ئه‌ده‌بی‌ خوێندكارانی‌ زانكۆی‌ كوردستان ئێواره‌ شێعرێك له‌ ژێر ناوی‌ "بارانه‌ شێعر" به‌ به‌شداریی‌ چه‌ند شاعیری‌ ناسراوی‌ كوردستان به‌ڕێوه‌ چوو.

له‌و ئێواره‌ شێعره‌دا كه‌ دوو كاتژمێری‌ خایاند، شاعیران سه‌عید نه‌جاری‌ (ئاسۆ)، حیسامه‌دین ئه‌مین، ره‌ئوف محه‌مه‌دپوور، سوهه‌یلا محه‌مه‌دی‌، عه‌دنان به‌رزنجی‌ به‌ خوێندنه‌وه‌ی‌ شێعر به‌شدار بوون‌و هه‌روه‌ها مه‌نسوور ره‌حمانی‌ ره‌خنه‌گر‌و لێكۆڵه‌ڕی‌ ئه‌ده‌بی‌ وتارێكی‌ سه‌باره‌ت به‌ شێعر پێشكه‌ش كرد.
به‌پێی‌ وته‌ی‌ به‌ڕێوه‌به‌رانی‌ ئه‌م ئێواره‌ شێعره‌ چه‌ندین شاعیری‌ شاره‌كانی‌ كرماشان‌و ئیلام بانگهێشت كرابوون به‌ڵام له‌لایه‌ن حه‌راسه‌تی‌ زانكۆوه‌ رێگه‌ نه‌درا شێعره‌كانیان بخوێننه‌وه‌. هه‌روه‌ها حه‌راسه‌تی‌ زانكۆ پێشی‌ به‌ شێعر خوێندنه‌وه‌ی‌ مامۆستا شه‌ریف، جه‌لال مه‌له‌كشا، ره‌حیم لوقمانی‌‌و سیمین چایچی‌ گرت.
ئه‌م ده‌ستێوه‌ردانه‌ی‌ حه‌راسه‌ت بۆته‌ هۆی‌ ناڕه‌زایه‌تیی‌ خوێندكاران‌و به‌شدارانی‌ كۆڕه‌ شێعره‌كه‌‌و له‌لایه‌ن ئه‌وانه‌وه‌ مه‌حكووم كرا.

شایانی‌ باسه‌ له‌م دوایانه‌دا رێژیم گوشارێكی‌ زۆری‌ خستۆته‌ سه‌ر ناوه‌ند‌و بڵاوكراوه‌ خوێندكارییه‌كانی‌ زانكۆی‌ كوردستان‌و داواكارییه‌كانی‌ ئه‌م ناوه‌نده‌ به‌رده‌وام له‌لایه‌ن دام‌و ده‌زگا ئه‌منییه‌تییه‌كانی‌ ده‌ره‌وه‌ی‌ زانكۆ‌و هه‌روه‌ها شوورای‌ فه‌رهه‌نگیی‌ زانكۆوه‌ ره‌ت ده‌كرێته‌وه‌. جێی‌ وه‌بیرهێنانه‌وه‌یه‌ كه‌ مانگی‌ بانه‌مه‌ڕی‌ ساڵی‌ رابردوو خوێندكاران بۆ ناڕه‌زایه‌تیی‌ ده‌ربڕین به‌م گوشارانه‌ كۆبوونه‌وه‌ی‌ ناڕه‌زایه‌تییانه‌یان پێك هێنا، به‌ڵام زۆربه‌ی‌ خوێندكارانی‌ به‌شدار له‌ودا سزادران‌و یه‌كێك له‌و سزادراوانه‌ ئاسۆ ساڵح چالاكی‌ خوێندكاری‌ بوو كه‌ له‌ تێرمێكی‌ خوێندن هه‌ڵپه‌سێردرا.